Юридик шахс ҳуқуқига эга бўлган, жамоа мулки ҳуқуқи асосида ўзига қарашли мулкка эгалик қиладиган, ундан фойдаланадиган ва уни тасарруф этадиган мустақил хўжалик юритувчи субъект кооператив ҳисобланади.

Жорий йил март ойида шаҳар ҳокими Гавҳар Алимова  Ингичкада бўлиб, 16 гектар экин майдонида кооперация ширкати ташкил этганида кўпчилик бу ғояга шубҳа билан муносабатда бўлган эди.

 

Орадан 6 ой ўтди.

Бугун шаҳар ҳокими Ингичкага бориб бундан бир неча ой илгари бошлаган лойиҳанинг ижросини кўрди.

Катта меҳнат ўз самарасини берди. Ер майдонида турли полиз экинлари униб чиқди.

Ўшанда 16 гектар ер 40 оилага бўлиб берилган, ер майдонини суғориш учун 1 км 400 метр сув қувури тортиб келинган эди.

Кооператив аъзолари асосан кам таъминланган оилалар вакиллари бўлиб, уларнинг меҳнатлари эвазига, қисқа муддат ичида, даштда катта  сабзавот экинлари  майдони яратилди.

Қонунчиликда “Ишлаб чиқариш ва ишлаб чиқариш-матлубот кооперативларининг фаолияти ўз аъзоларининг, шунингдек меҳнат шартномалари (контрактлар, битимлар) бўйича ишлаётган кишиларнинг ўз меҳнатлари билан шахсан иштирок этишига асосланади. Кооперативлар тармоқ, ҳудудий ва бошқа белгилар бўйича хўжалик уюшмаларига ихтиёрийлик асосида бирлашиб фаолият олиб боришлари мумкин.” деб қайд этилган.

– Йиллар давомида фойдаланилмаган майдон ўзлаштирилгач,  кутилгандан зиёд натижа берди, _–_ дейди шаҳар ҳокими Г. Алимова. – Биз ер ажратганимизда кўпроқ камбағалликдан чиқишга ҳаракат қилаётган, меҳнат қилишдан қочмайдиган оилаларга эътибор қаратган эдик. Эндиги вазифамиз шу тажрибадан келиб чиқиб, 500 гектар ерни узлаштиришни кўзлаб турибмиз.

Ингичкада бошланган деҳқончилик ишлари келгусида катта самара беради, дея умид қиламиз.

Каттақўрғон шаҳар ҳокимлиги

Ахборот хизмати