Аёл деганимизда кўз олдимизга не-не буюк инсонларни дунёга келтирган мунис оналаримиз, лобар қизларимиз, оилаларимизнинг файзи ва фариштаси бўлган опа-сингилларимиз келади.

Инсоният яралибди-ки, яратганнинг мўъжизаси бўлган ана шундай нозик хилқат вакилалари бўлган  аёлларга бўлган муҳаббат ва эҳтиром бир дақиқа бўлса-да сўнган эмас. Аёл борки кўнгилларда баҳор яшайди.

 

Шаҳримиздаги “Дониёрбек” тадбирлар масканида 8 март-Халқаро хотин-қизлар куни муносабати билан бўлиб ўтган тадбирда оилалар файзи хонадонлар кўрки бўлган аёлларнинг шаънига ана шундай илиқ сўзлар айтилди.

Тадбирни очиб берган шаҳар ҳокими Гавҳар Алимова хотин-қизларни баҳорнинг энг гўзал байрами 8 март Халқаро хотин-қизлар куни билан самимий муборакбод этди.

Аёл-мўътабар она, суюкли ёр, жондан азиз қиз сифатида улуғланиб келинади. Аёл-севги ва муҳаббат рамзи, вафо-садоқат тимсоли, оила шамчироғидир.

Давлатимиз Раҳбарининг "Аёлни эъзозлаш, аёлга эҳтиром кўрсатиш халқимизга хос олижаноб қадрият ҳисобланади. Биз, барчамиз қандай касб, қандай лавозимда ишламайлик, қалбимиз, юрагимиздаги жамики эзгу фазилатлар учун сиз, меҳрибон аёллардан умрбод қарздормиз.

Айниқса, сиз, азизларнинг соғлом зурриёд, баркамол авлодни тарбиялаб вояга етказишдаги ўрнингиз ва хизматингизни ҳеч нарса билан қиёслаб, баҳолаб бўлмайди.

Сизларнинг меҳр-муҳаббатингиз, вафо ва садоқатингиз, фидойилигингиз сабабли ҳаётимиз чароғон. Сизлар туфайли оилаларимизда тинчлик-осойишталик, қут-барака ҳукм сураётгани учун барчангизга ҳар қанча тасанно айтсак, арзийди, албатта”, -деган сўзлари ҳам биз аёлларга бўлган чексиз ҳурмат ва эҳтиромнинг юксак намунасидир,- дея таъкидлади шаҳар ҳокими ўз сўзида.

Шундан сўнг Каттақўрғон шаҳрини ижтимоий иқтисодий ривожлантириш йўлида самарали хизмат қилиб келаётган бир гуруҳ каттақўрғонлик фаол хотин-қизлар шаҳар ҳокимлигининг фахрий ёрлиқ ва ташаккурномалари ҳамда эсдалик совғалари билан тақдирландилар.

Пойтахтдан ташриф буюрган санъаткорлар ижросидаги куй ва қўшиқлар айниқса, тадбирга кўтаринкилик бағишлади.

Бугун жамият ҳаётининг турли соҳаларида хотин-қизлар фаоллик кўрсатиб меҳнат қилиб келмоқдалар. Шу ўринда каттақўрғонлик хотин-қизлар ҳам бугун уларнинг эришаётган муваффақиятлари юртимизда хотин-қизларга берилаётган юксак эътибор, қўллаб-қувватлаш борасидаги ишларнинг самараси дея эътироф этадилар.

Ажойиб куй-қўшиқлар тадбир иштрокчиларини рақсга чорлади.

Ҳақиқатдан ҳам бугун мамлактимизда хотин-қизларни қўллаб-қувватлаш борасида олиб борилаётган ишлар эътирофга лойиқ. Албатта, буни байрам дастурхони атрофида жамулжам бўлган каттақўрғонлик хотин-қизларнинг юзларида табассум ва шукроналик акс этиб тургани мисолида ҳам кўриш мумкин.

Азиз аёллар, шаҳримиз хотин-қизлари яна бир бор байрамингиз муборак бўлсин.

Каттақўрғон шаҳар ҳокимлиги ахборот хизмати.