Ma’lumki, shu kunlarda yurtimiz bo‘ylab Xalqaro oila kuni doirasida oilalarni mustahkamligini ta’minlash, aholi, xususan yoshlar ongiga oilaning muqaddas qo‘rg‘on sifatida e’zozlanishi va uni asrash azaliy qadriyat ekanligini sindirishga qaratilgan turli ma’naviy-ma’rifiy tadbirlar, uchrashuvlar bo‘lib o‘tmoqda. Jumladan, O‘zbekiston Respublikasi Vazirlar Mahkamasining 2025-yil 2-maydagi 29-son bayoni bilan tasdiqlangan 15-may - Xalqaro oila kunini keng nishonlash maqsadida 10-maydan –10-iyunga qadar “Farovon oila sari” oyligini o‘tkazish bo‘yicha chora-tadbirlar rejasiga muvofiq, Kattaqo‘rg‘on Davlat pedagogika institutida “Oila-ma’naviyat va insonparvarlik maskani” mavzusidagi respublika ilmiy-amaliy konferensiyasining o‘tkazilishidan ko‘zlangan maqsad ham shu.

Konferensiya ishida O‘zbekiston Respublikasi Bosh vaziri o‘rinbosari – Oila va xotin-qizlar qo‘mitasi raisi Zulayho Mahkamova, Oliy Majlis Senati a’zolari va Qonunchilik palatasi deputatlari, respublikamizning oila masalalari bo‘yicha yetakchi pedagog, psixolog olimlari, tuman, shaharlarning oila va xotin-qizlar bo‘limi boshliqlari, viloyat hamda shahar kengashi deputatlari hamda keng jamoatchilik vakillari ishtirok etdilar. Kattaqo‘rg‘on shahar hokimi Gavhar Alimova ochib bergan Konferensiyada so‘z olgan Oila va xotin-qizlar qo‘mitasi raisi Zulayho Mahkamova yurtimizda oilalar mustahkamligini ta’minlash, xotin-qizlarni har tomonlama qo‘llab-quvvatlash borasida amalga oshirilayotgan ishlar xususida hamda bugungi konferensiyaning mazmun-moxiyati haqida so‘z yuritdi. Kattaqo‘rg‘on shahar hokimi Gavhar Alimovaning shaharda amalga oshirilgan ishlar, oilalar mustahkamligini ta’inlash, xotin-qizlarni qo‘llab-quvvatlash borasidagi ishlar yuzasidan taqdimoti namoyish etildi. Shuningdek, Konferensiya davomida oila masalalari bo‘yicha professor o‘qituvchilar va psixolog olimlarning oilalarni mustahkamligini ta’minlash, oilaviy qadriyatlarni asrash, ona-onalik masalalari mavzularidagi ma’ruzalari tinglandi. “Oila-ma’naviyat va insonparvarlik maskani” mavzusidagi respublika ilmiy-amaliy konferensiyasida oila, uning davlat va jamiyat hayotidagi o‘rni, oilaga daxldor muammolar, mas’ul tashkilotlar, keng jamoatchilik oldidagi ustuvor vazifalar atroflicha muhokama qilindi. Fikr-mulohazalar almashildi. Tegishli tavsiyalar ishlab chiqildi. Konferensiyaning ikkinchi qismida mehmonlar shahar bo‘ylab sayohat davomida keyingi yillarda amalga oshirilgan ulkan bunyodkorlik ishlari, shaharni ijtimoiy-iqtisodiy rivojlantrish, yo‘l infratuzilmasini, aholi farovonligini yaxshilash borasidagi ishlar bilan yaqindan tanishdilar. Konferensiyaning ikkinchi qismida “Farovon oila sari” oyligi doirasida “Ibratli oila” ko‘krak nishoni sohibalari, ahil oilalar, yosh kelin-kuyovlar ishtirokida “Oilalar sayli” (Oilafest); “Oila – bolalar nigohida” rasmlar ko‘rgazmasi o‘tkazildi.

Kunning ikkinchi yarmida mehmonlar Kattaqo‘rg‘on suv omborida tashkil qilingan “Madaniyat va eko - turizm” klasterining ochilish marosimida ishtirok etdilar. Tadbir yakunida poytaxtdan tashrif buyurgan taniqli san’atkorlar ishtirokida konsert Shou tashkil etildi..