25- ноябрь куни Президентимиз Самарқанд вилоятига ташриф буюрди ва ушбу ташрифда шаҳар ва вилоят ривожланиши учун асосий вазифалар белгиланди.
Асосий йўналишлар иқтисодий ривожланиш ва инвестиция муҳитини яхшилаш, янги иш ўринлари яратиш, инфратузилма ва транспортни замонавийлаштириш, ёшлар ва аёллар фаоллигини қўллаб-қувватлаш, маънавий ва маданий тадбирларни ривожлантириш ҳамда Самарқанднинг тарихий ва маданий меросини сақлаш ҳамда туристик салоҳиятни оширишдан иборат эди.
Президент таъкидладики, ҳар бир вилоят ва шаҳар фаоллиги мамлакатнинг барқарор тараққиёти кафолати бўлиб, Самарқандни замонавий, қулай ва барқарор ривожланадиган шаҳарга айлантириш, аҳолининг турмуш даражасини яхшилаш ва иқтисодий имкониятларни кенгайтириш керак.
-Ўзида кўп минг йиллик тарих ва қадриятларни мужассам этган, замонавий меъморчилик анъаналари асосида кундан-кунга чирой очиб бораётган бу улуғ замин дунё цивилизациясида ўз ўрнини тобора мустаҳкамлаб бормоқда. “Боқий шаҳар” мажмуаси барпо этилиб, 40 дан зиёд муқаддас зиёратгоҳлар обод бўлди. “Самарқанд” халқаро аэропортининг янгидан қурилгани, ўнлаб халқаро бренд меҳмонхоналарнинг иш бошлагани вилоят туризм салоҳиятини янги босқичга олиб чиққанлиги айни ҳақиқат. Энди Самарқанд – ишсизлик ва камбағалликни қисқартириш, инвестиция, экспорт, умуман барча соҳада методик вилоят бўлиши керак”,-дея таъкидлади Президент.
Дарҳақиқат, Самарқанд сўнгги йилларда сиёсий, иқтисодий, туризм ва бизнес марказига, кўплаб йирик халқаро тадбирлар, форум ва анжуманлар учун мулоқот майдонига айланди. Шу йилни ўзида Самарқандда 40 дан ортиқ нуфузли халқаро анжуманлар ташкил этилгани, айниқса, яқинда ЮНЕСКО Бош конференцияси 43-сессиясининг ўтказилгани мамлакатимиз тарихидаги улкан воқеа бўлди.
Президентимизинг қўллаб-қувватлаши билан 600 мингдан ортиқ аҳоли истиқомат қиладиган, Республикамиздаги йирик саноат ҳудудига айланган Ургут шаҳрида 55 километр темир йўл линиясининг ишга туширилгани қувонарли бўлди.
Президентимизнинг маърузасидан келиб чиқиб, Самарқанддан кейинги вилоятнинг иккинчи йирик шаҳри – Каттақўрғонни ҳам янги ривожланиш босқичига чиқариш учун муҳим вазифалар белгиланди. Шу вазифалар орасида янги ишлаб чиқариш корхоналари ва кичик бизнесни ривожлантириш, инвестиция имкониятларини кенгайтириш, маҳаллий ишлаб чиқарувчиларни қўллаб-қувватлаш, йўллар, кўприклар ва коммунал хизматларни модернизация қилиш, замонавий транспорт тармоғини жорий этиш ва электрон хизматлар ҳамда шаҳар бошқарувини самарали ташкил этиш каби йўналишлар бор. Шу билан бирга, маориф, спорт ва маданий тадбирларни кенгайтириш, ёшлар ва аёллар фаоллигини қўллаб-қувватлаш, меҳнат ва ижтимоий соҳаларда барқарорликни таъминлаш, тарихий ва маданий меросни сақлаш ва туристик салоҳиятни ошириш ҳам асосий вазифалардан ҳисобланади.
Каттақўрғоннинг энг асосий имкониятлари шундан иборатки, шаҳар Саноат ва хизмат кўрсатиш соҳасида янги корхоналар учун замонавий инфратузилмага эга, кичик ва ўрта бизнес учун кенг имкониятлар мавжуд, йўллар, кўприклар ва коммунал хизматлар модернизация қилиб, аҳоли ва туристлар учун қулайлик яратиш мумкин, тарихий ва маданий объектлар, фестиваллар ва туризм лойиҳалари орқали шаҳар минтақавий ва халқаро диққат марказига айланиши ва ёшлар ҳамда аёллар фаоллигини ривожлантириш орқали замонавий ва барқарор шаҳар муҳитини яратиш мумкин.
Президент ташрифи шаҳар учун янги имкониятлар эшигини очди ва бу имкониятларни самарали амалга оширишимиз, инвестиция ва ижтимоий лойиҳаларни ўз вақтида рўёбга чиқаришимиз лозим. Каттақўрғон нафақат Самарқанд вилоятининг иккинчи маркази, балки янги Ўзбекистонда ўз салоҳиятини намоён этадиган шаҳарга айланиши керак.
Гавҳар АЛИМОВА,
шаҳар ҳокими.