Kattaqo‘rg‘on shahrida tadbirkorlik muhitini yaxshilash, muammolarni joyida o‘rganib, tezkor hal etish maqsadida Kattaqo‘rg‘on shahri va Kattaqo‘rg‘on, Paxtachi, Narpay, Ishtixon, Pastdarg‘om tumanlari tadbirkorlari ishtirokida ochiq muloqot o‘tkazildi. 

Muloqotda Iqtisodiyot va moliya vazirligi, Markaziy bank, Kambag‘allikni qisqartirish va bandlik vazirligi, Soliq qo‘mitasi, Savdo-sanoat palatasi, shahar hokimi, Samarqand viloyati va tegishli tuman hokimlarining birinchi o‘rinbosarlari, shuningdek, tijorat banklari rahbarlari o‘rinbosarlari qatnashdi.

Muloqot davomida ishlab chiqarish sohasida imtiyozlardan foydalanish tartibi, yangi tadbirkorlik sub’ektlari, xususan, yoshlar va ayollar tadbirkorligiga ajratilgan kreditlar, kompensatsiyalar hamda moliyaviy qo‘llab-quvvatlash mexanizmlarining amaldagi holati muhokama qilindi.

Mas’ul tashkilotlar tadbirkorlarning murojaatlarini joyida tinglab, har bir masala kesimida aniq choralar belgilandi.