2025 yilning dastlabki uch oyi Kattaqo‘rg‘on shahar Tibbiyot tizimida yangi bosqichni boshlab berdi. Sog‘liqni saqlash sohasida amalga oshirilayotgan yangiliklar orqali aholiga yaqinlashish, tibbiy xizmatlarni inson uchun qulay qilish va eng muhimi — inson hayotini qadrlash tamoyili yetakchi o‘rinni egalladi.

Elektron tizimlar — qulay va zamonaviy xizmatning asosi.

Tibbiyot birlashmasiga qarashli barcha muassasalarda “DMed” axborot tizimi joriy etildi. Bemorlar elektron yo‘llanmalar orqali shifokor ko‘rigidan o‘tish, mutaxassisga murojaat qilish va statsionar davolanish imkoniga ega. Bu nafaqat tezkorlik, balki shaffoflik va samaradorlikni ham ta’minlamoqda. Birlashmaning 5 ta bo‘limi zamonaviy kompyuterlar va lokal internet tarmoqlari bilan jihozlandi. Qog‘ozbozlik, navbatda turish, adashgan javoblar — o‘tmishda qoldi.

Shahar bo‘yicha 4 ta dorixona “Rembursatsiya” dasturiga ulanib, tibbiy sug‘urta tizimi orqali bemorlarni bepul dori-darmon bilan ta’minlash faol yo‘lga qo‘yildi. Davlat tomonidan ajratilgan maxsus moliyaviy mablag‘lar asosida “D” nazoratda turuvchi bemorlarga 27 turdagi muhim dori vositalari berib kelinmoqda. Biroq, dorixonalarga mablag‘ o‘tkazilmagani ayrim bemorlarni hayotiy dorilarsiz qoldirgan — bu tizimni yanada ishonchli qilish mas’ullar oldidagi vazifadir.

Skrininglar va profilaktika — hayotni saqlab qolish

40 yoshdan katta 6635 fuqaro skriningdan o‘tkazildi, 594 ta holat aniqlandi va ulardan 465 nafari ambulator sharoitda davolandi. Bu ko‘rsatkichlar kasalliklarni erta aniqlash va vaqtli davolashning amaliyotdagi samarasini namoyon etmoqda.

Sog‘lom turmush tarzi — shiordan hayot tarziga

1300 dan ziyod targ‘ibot materiallari tarqatildi, 9 ta trening, 1439 nafar aholi bilan bevosita muloqot o‘tkazildi. Tibbiy brigadalar xonadonbay yurib, “sog‘lom ovqatlanish” g‘oyasini oddiy va tushunarli tilda tarqatdi. Sog‘lomlik ilovalari va Telegram botlar faol targ‘ib qilinmoqda.

Alohida toifalar e’tibor markazida:

• “Oila va xotin-qizlar maskanlari” orqali 57 nafar xotin-qizga psixologik va huquqiy yordam ko‘rsatildi;

• “Keksalik gashti” sport tadbirlari keksalarga ma’naviy ko‘tarinkilik bag‘ishladi;

• Harbiy xizmatchilarning rafiqalari uchun maxsus tadbirlar tashkil etildi.

Huquqiy madaniyat va zo‘ravonlikka qarshi kurash

“Biz tamakisiz hudud uchun ovoz beramiz” shiori ostida 9 ta aksiya o‘tkazildi. Bu kampaniya faqat targ‘ibot emas — bolalar nafas oladigan toza havo, erta kasalliklarning oldini olish, hayot sifati uchun kurashdir.

Kattaqo‘rg‘onda amalga oshirilayotgan ishlar keng ko‘lamli islohotlardan tashqari, inson hayoti, salomatligi va kelajagini yaxshilashga qaratilgan. Tibbiyot faqat poliklinika devorlarida emas, balki inson yuragida joy olmoqda. Mavjud muammolarni tan olib, hal qilish — barchaga birdek mas’uliyat.

Kattaqo‘rg‘on shahar Tibbiyot birlashmasi boshlig‘i Xumoyun Xamraev