O‘zbek xalqi tarixining XIX asr oxiri – XX asr boshlaridagi davri el-yurt taqdiridagi muhim ahamiyatga molik davr bo‘ldi desak mubolag‘a bo‘lmaydi. Zero, ushbu davrda maydonga kelgan jadid ma’rifatparvarlik harakati maktab va maorif, matbuot, adabiyot va san’at sohalarida islohotlarni amalga oshiribgina qolmay, xalqning madaniy, ma’rifiy va ruhiy hayotini butunlay o‘zgartirdi.

Shahar Yoshlar ishlari bo‘limi tashabbusi bilan Drama teatrida namoyish etilgan “Jadidlar jasorati-millatimiz faxri” nomli spektakl davomida jadidchilik harakatining namoyondalari xizmatlari talqin etildi.

Yoshlar yetakchilari tomonidan Abdulla Avloniy, Mahmudxo‘ja Behbudiy, Munavvarqori Abdurashidxonov, Abdurauf Fitrat, Is’hoqxon Ibrat, Abdulhamid Cho‘lpon, Abdulla Qodiriy, G‘ulom Zafariy, Usmon Nosir kabi milliy uyg‘onish va millatparvarlik harakatining oldingi saflarida turgan millat fidoyilarining hayoti talqin qilingan spektakl tomoshabinlarning olqishlariga sazovor bo‘ldi.

Shahar hokimi Gavhar Alimova bugungi zamon yoshlarining ilmli va salohiyatli bo‘lishi, maktabchilik asoslari, dars o‘tish tartiblarining joriy etilishida jadidlarning o‘rni beqiyos ekanligini e’tirof etdi. Shuningdek, jadid ziyolilar bilan haqli tarzda g‘ururlanish va iftixor hissi millatning ko‘ksini yuksaltirishi, ulug‘ maqsadlar sari dadil intilishda mardlik va jasorat namunasi bo‘lib xizmat qilishini alohida ta’kidladi.