Шаҳар драма театрида жорий йилда талабаликка қабул қилинган ёшлар билан учрашув бўлиб ўтди. Унда шаҳар ҳокими Гавҳар Алимова, сектор раҳбарлари, жамоатчилик вакиллари ва ёшлар қатнашдилар.

Тадбирда сўз олган шаҳар ҳокими Г.Алимова ҳамда шаҳар прокурори И.Нуриддиновлар талабалик бахтига эришган ёшларни қутлар экан, албатта, бу натижалар юртимизда ёш авлоднинг таълим-тарбия олиши учун яратилган шарт-шароитлар ва берилаётган алоҳида эътиборнинг натижаси эканлигини таъкидладилар.  

Тадбирда сектор раҳбарларининг битирувчиларга табрикномалари топширилди.  

Шунингдек, учрашувда умумтаълим мактабларида таълим сифатини ошириш борасидаги ишлар, ўқувчиларнинг жумладан, битирувчиларнинг ютуқлари ҳақида сўз юритилди.

          2023-2024-ўқув йилида шаҳардаги умумтаълим мактабларини битирган 807 нафар ўқувчиларнинг 18 нафари олтин ва 4 нафари кумуш медаллар билан тамомлади. Битирувчиларнинг 264 нафари давлат олий таълим муассасаларига ўқишга киришган бўлса, шулардан 59 нафари давлат гранти асосида 206 нафари тўлов контракти асосида ўқишга қабул қилиниб, шаҳримиз кўрсаткичи вилоят бщйича ўтган йилги 14-ўриндан 3-ўринга кўтарилди.

        2023-2024-ўқув йили давомида ўқувчилар вилоят ва Республика миқёсида ўтказилган танловларда бир қатор совринли ўринларни ҳам қўлга киритишди.

       Жумладан, 11-ихтисослаштирилган давлат умумтаълим мактаб миллий гвардия “Барс” жамоаси Республика босқичида 3-ўринни, 14-ИДУМ ўқувчи ва ўқитувчилари “Хорижий тилларни ўқитиш бўйича энг яхши мактаб” Республика танловининг вилоят босқичида 3-ўринни, 2-ИДУМ  жамоаси “Тўрон” Республика танловининг вилоят босқичида 3-ўринни, “Ёш китобхон” танловининг Республика босқичида 3-ўринни эгаллаганлари шулар жумласидандир.

           3-мактабнинг 10-синф ўқувчиси Севара Маматованинг бокс бўйича жаҳон чемпиони бўлганлиги, 20-мактабнинг 10-синф ўқувчиси Солиҳабону Дагарованинг Тошкент шаҳридаги Amity universitetida “ICT4Girls” 45 нафар қизлар ўртасида ўтказилган IT бўйича олимпиаданинг Республика босқичида фахрли 3-ўринни қўлга киритгани, Европада ўтказиладиган Халқаро олимпиадада иштирок этганлиги алоҳида эътироф этилди.

           Шунингдек, тадбирда жорий йилда талабаликка қабул қилинган ёшлар ҳам сўзга чиқиб, муваффақиятлари ҳақида сўз юритдилар ва келгусида ўз билим ва малакалари билан юртимиз ва шаҳримизни тараққий эттиришда муносиб ҳисса қўшишларини таъкидладилар.

Тадбирда пойтахтлик санъаткорлар ҳам ўзларининг мусиқий чиқишлари билан иштирок этдилар.

  Каттақўрғон шаҳар ҳокимлиги ахборот хизмати.

Report content on this page