Maxsus imkoniyatlar
Ҳурматли дўстлар!
Барчангизни 9 май – Хотира ва қадрлаш куни - буюк Ғалабанинг 75 йиллиги билан чин қалбимдан муборакбод этаман.
Ҳеч шубҳасиз, бу даҳшатли уруш, бутун инсоният қатори, бизнинг халқимизга ҳам мислсиз кулфат ва йўқотишлар олиб келди.
1941 йилнинг охирида мамлакатимиздаги 300 га яқин корхона ҳарбий қурол ва аслаха ишлаб чиқаришга мослаштирилиб 2100 та самолёт, 17100 та миномёт, 22 миллион мина, 60 мингга яқин ҳарбий кимёвий апаратура, 560 минг снаряд, 1 миллион граната, 300 мингта парашют, 22 мингта кўчма ошхона ва кўплаб кийим-кечаклар етказиб берилган.
Қонли жангларда Ўзбекистондан 1,5 миллиондан ортиқ киши урушда қатнашган. Уларнинг 500 мингдан кўпроғи жанг майдонларида ҳалок бўлишган.
Уруш йилларида каттақўрғонликлар ҳам бемисл жасорат кўрсатганлар. Урушнинг дастлабки ойларида Каттақўрғон халқи Беларусия, Украина ва Россиянинг қишлоқ ва шаҳарларидан келтирган 1200 нафар болани ўз бағрига олган.
1941 йилда Каттақўрғонда тузилган 213-ўқчи дивизиясининг 4692 жангчиси кўрсатган жасорати учун орден ва медаллар билан тақдирланган. 5 нафар каттақўрғонлик Совет Иттифоқи Қаҳрамони унвонига сазовор бўлди. Каттақўрғон ҳарбий комиссариятидан урушга юборилган Павел Риндин, Рамел Абдиршин, Сафар Хушназаров, Надежда Папова ва Александр Фуковскийларга қаҳрамонлик унвони берилган.
Урушда Каттақўрғон шаҳридан қатнашган 15 минг кишининг 6460 нафари жанг майдонларида мардларча ҳалок бўлдилар, 8 000 нафари ногирон бўлиб қайтди.
Жангларда юксак мардлик кўрсатган каттақўрғонликларнинг жасорати тарих саҳифаларига абадий муҳрланди.
Каттақўрғонлик Хамид Саматовнинг фидойилигини юксак эътироф этиш ўринли. Зеро, у Ўзбекистонга келтирилган 14 нафар ота-онасиз қолган болаларни ўз бағрига олди.
Жанг майдонларида мардлик ва жасорат кўрсатган, фронт ортида фидокорона меҳнат қилган қаҳрамон фахрийларимизнинг босиб ўтган йўли фидокорлик намунасидир.
Юрт тинчлиги ва озодлиги йўлида жонини фидо қилган юксак жасорат соҳиблари халқимиз қалбида абадий яшайди. Ватанимиз хавфсизлиги, чегараларимиз дахлсизлигини сақлаш йўлида мардларча ҳалок бўлган ҳамшаҳарларимиз Улуғбек Барноев, Жамшид Расулов ҳамда Бахром Эргашевларнинг ёрқин хотирасини бугун Каттақўрғон аҳли ҳурмат ва эҳтиром билан тилга оладилар. Мард ва жасур ўғлонларнинг Ватан олдидаги хизматлари муносиб баҳоланиб “Жасорат” медали билан тақдирландилар. Энг муҳими бу йигитларнинг кўрсатган қаҳрамонликлари ҳар бир каттақўрғонлик ёшлар учун мардлик ва жасорат тимсоли бўлиб қолади.
Мана шу улуғ айём кунида барчамиз энг аввало уруш майдонларидан қайтмаган, Ватанимиз тинчлиги йўлида жон берган ҳамшаҳарларимизнинг муқаддас хотираси олдида бош эгиб, уларнинг руҳи покларига ҳурмат бажо келтирамиз.
Азиз ҳамшаҳарлар!
Барчангизни Хотира ва Қадрлаш куни - буюк Ғалабанинг 75 йиллиги билан яна бир бор қутлаб, сиҳат-саломатлик, бахт-саодат тилаб қоламан. Илоҳим юртимиз тинч, осмонимиз мусаффо бўлсин.
