Бугунги кунда аҳоли мурожаатларини ҳал этилишида ўтказилаётган қабулларнинг аҳамияти катта бўлмоқда. Куни кеча шаҳар ҳокимлигида вилоят ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари-вилоят иқтисодий тараққиёт ва камбағалликни қисқартириш бошқармаси бошлиғи Ж.Ўроқов томонидан ташкил қилинган сайёр қабулда ҳам каттақўрғонлик тадбиркорларнинг муаммолари эштилди.

Сайёр қабулда мутасадди ташкилотлар вакиллари ҳамда 21 нафар тадбиркор турли масаладаги мурожаатлари билан иштирок этдилар. Вилоят ҳокими ўринбосари ҳар бир тадбиркор билан юзма-юз суҳбатлашган ҳолда уларнинг мурожаатини тинглади. 

Мурожаатларнинг аксарияти кредит масаласида бўлди. Қабулда қатнашган банк мутасаддиларига тадбиркорларнинг кредит юзасидан қилган мурожаатларини сансоларликка йўл қўймасдан ҳал этиш чорасини кўриш бўйича топшириқлар берилди.

Шунингдек, қабул давомида тадбиркорлардан тушган электр, сув, газ ҳамда лицензия олиш масаласидаги мурожаатлар ҳам атрофлича ўрганилди ва мутасаддилар бу борада ижобий ечим топишлари юзасидан тегишли кўрсатмаларни олдилар. 

Шу куни 5 та мурожаат жойида ҳал этилган бўлса, қолган 16 та мурожаатнинг ижроси назоратга олинди.

Каттақўрғон шаҳар ҳокимлиги Ахборот хизмати